Sunday, January 15, 2012

Post 8: STROKE

Stroke hi Mizote pawhin kan hmêlhriat ve ta hle mai. Ram changkângah chuan thihna chhan tam ber pathumna a tling hial a ni. Stroke hi hmeichhia aiin  mipaah a tam zawk a, kum 40  chunglamah a awm deuh ber. A awmtîrtu tam ber chu Thisen sâng (hypertension) hi a ni.

Stroke chu engnge?  Stroke chu thluaka thisen zâm kal dik loh avanga vawilehkhata taksa lo chau thut emaw, pangkhing zeng thut emaw, ṭawng thei lo hiala lo awm thut, darkar 24 aia rei awh  hi a ni kan ti thei awm e.
Stroke hi a nasat leh nasat  loha zirin chi hrang hrangin an sawi leh a:
·    Complete  stroke:  rei lo teah (darkar 6 chhûngin) taksa a khawih tur a khawih vek hman
·    Stroke-in-evolution: Stroke a thlen aṭanga darkar 24 chhûnga a natna hmasâwn dân sawina a ni.
·    Minor stroke: damlo chu taksaah chhiat hlenna thleng lovin a ṭha chhuak leh (chawlhkar khat chhungin an ṭha chhuak tlangpui).
·    Transient Ischemic Attack(TIA): rei lo te chhûng taksa bung khawilai emaw ber lo chau thut emaw, ṭawng thei lo thut emaw, mit del thut emaw an nei a, darkar 24 chhungin a dam fel leh vek ṭhin.
Stroke chu engtia lo awm nge?  Stroke awm chhan tlanglâwn ber ber  kawng 3-in a sawi theih âwm e:
·    Taksa peng dang khawimaw lai aṭanga thisen khal emaw bawlhhlawh dang lo lûtin thisen zâm rawn zuiin thluak thisen zâm khawimaw laiah a tâng ta a,  a bul hnai thluak area chuan thisen a hmuh loh avangin a hliam(infarct) ta a, chu chuan taksa zeng leh thil dangte a rawn thlen ta ṭhin a ni.
·    Thluak leh a bul hnaia thisen zâm hrim hrim  ṭhat loh avangin thluaka thisen kal lai a dang ping  thei bawk.
·    Thluak chhungah thi pût a awm vangin.

Stroke awmtîrtu ṭhenkhat leh a invên dante:
·     BP sâng(Hypertension):  Stroke tam ber chu BP sâng vâng a ni.  BP sâng neite tan BP sâng lo tûra inenkawl hi Stroke pumpelh tura invênna  pawimawh ber chu a ni.  BP sâng nei ṭhenkhatin, “Engmah harsatna ka nei chuang lo. BP sâng hian min ‘effect’ lo ve. Hetiang BP sâng hi chu ka ‘normal’ ve rêng a ni e” tiin  damdawi ei loh an chîng ṭhin a, heihi a hlauhawm êm êm a ni. Pâwn lamah an taksain tuar lovin lang mah se an thluaka thisen zâm te tak tê tê (capillaries) tân khân a hlauhawm êm êm a, BP sâng “pressure” khan a tipuakkeh thei a, an rin loh hlânin  Stroke-in a man thut fo ṭhin a nih hi.
·    Mei zûk:  Vaihlo zial zu miten mi pangngai aiin stroke an nei awl bîk a, mei zûk loh hi invênna pawimawh tak a ni bawk. Mei nghei aṭanga kum khat hnuah Stroke neihna ‘chance’  zaa sawmnga (50%)-in a tlahniam a, kum 5 nghei hnuah chuan mi pangngai ang an lo ni ṭhin.
·   Ṭhu chunga hnathawh:  Taksa hah lo leh che chhuak lova awmhmuna awm reng hian Stroke neih a hlauhawm bîk bawk. Computer hmaa nilêng lênga ṭhut te hi a hlauhawm hle a, rei tak tak ṭhut reng ngai ang chi hna kan nei a nih pawhin a khât tâwka dina office chhûngah pawh kea vei kual vêl fo ṭhin  tûr a ni.
·    Zû:  Zu tlêm in ṭhin hian engemaw chenah Stroke a vêng  an ti!
·    Thau lutuk:  Taksa rihna a tawk chauha vawn hi a pawi mawh hle bawk.
·    Lung natna: A bik takin lungphu rang lutuk leh mumal lo (Atrial fibrillation) te, lung ‘valve’ ṭha lo te  hian Stroke an siam awl hle a, hêng hi enkawl vat vat tûr a ni.
·    Zun Thlum (Diabetes): Zun thlum veite tân ngun taka inenkawl loh chuan Stroke vei a hlauhawm bîk bawk.
·    Polycythaemia: Thisenah nasa takin  red blood cells (RBC) an lo pung hluai a, chu chuan thisen a tikhal a, Stroke a siam thei. Hetiang natna neite tan inenkawl ṭhat a pawimawh hle bawk.
·    Thluaka thisen zâm kaw zîm:  Thluak thisen petu thisen zâm zinga pakhat Carotid artery  an tih hi a nih tûr aia zîmin a awm thei a, chu chuan stroke a siam thei a, hetiang hi hriatchhuah chuan zai dam theih a ni bawk.
·    Thisena cholesterol sâng:  Damdawi pakhat Statin  an tih ho hmanga cholesterol tihhniam hian Stroke engemaw chen  a vêng thei bawk.
·    Syphillis:  He natna hian stroke leh thluak natna dang a thlen ve thei a, enkawla tihdam a pawimawh.

Stroke chu engtiangin nge a lo lanchhuah?  Thluak a khawihna lai leh a khawih chhiat zau leh zau loha zirin a lanchhuah dân a dang thei. A tlanglâwn berah chuan second rei lo te aṭanga darkâr engemaw zât chhûngin thluak a khawih chhiat lohna lam taksa pangkhing kha a lo zawiin a lo zeng ṭan a, hmai pangkhing pawh a khawih tel châwk ṭhin. A châng chuan ṭawng thei lovin an lo awm bawk ṭhin.  Lu nâ emaw nikhaw hre lova awm hi an awm khât hle a, phûngzâwl tlu anga han tlûk erawh chu nei an awm ve zeuh mai thei.
Thluak hnûn (Brain stem) lam a khawih tel chuan mit khawhmuh fiah lo te, thil lem theih lohna te, kut leh ke zawng zawng zeng te,  luhai te, luak te,  zun leh êk ‘control’  theih lohna te, nikhaw hriat lohna te a thleng thei bawk.
Test tih tûrte:
·    CT Scan/MRI:  Hei hi a remchâng hmasa bera  tih a ṭha.  Stroke awm chhan kha engemaw chen a hriat theih ṭhin a ni.
·     Test dangte chu-
o   BP/Pulse check
o   Thisen test (FBC,ESR,Platelets, Syphillis serology, U&E,adt.)
o   Chest XRay
o   ECG
o   Carotod Doppler
o   adt.
·    Heng test chi hrang hrangten an tum ber chu-
o   A natna dik tak hriat chhuah
o  Stroke chu thluaka thisen pût vang nge thluak hliam (infarction) vang tih finfiah
o   A awmtîrtu natna dang hmuh chhuaha enkawl nghâl.

Stroke chu engtia enkawl tûr nge?  Damlo chu a tîrah chuan damdawiin panpui ngei tûr a ni a, a natna dinhmun tak hriat a nih hnuah chuan damlo dinhmun leh hospital dinhmuna zirin damdawiina enkawl zui chi nge in lama enkawl tûr tih thutlûkna siam theih a ni ang. Damlo na lutuk lo chu in lama enkawlin, a ṭûl ang zêla doctor râwn chhunzawm mai ṭhin a finthlâk mai thei. Damdawiin changkângah chuan Stroke Unit te an nei a, a ṭangkai hle.
Stroke-a damlo enkawl dân tlângpui hetiang hian lo entîr ila:
·     Damdawiinah ‘admit’ nghal
·     Doctor/nurse hovin hengte hi an han ngaihven zung zung ang:
o   Damlo chu a thaw ṭha em? Oxygen pek a ngai em?
o   A lungphu/BP a ṭha em? A BP a sâng em?
o   Tui/chaw a lem thei em?
o   A ‘blood sugar’a sâng/hniam em?
o   Thisen chaw pêk a ngai mai thei bawk.
·    CT Scan/MRI hmangin an endik ang a, chuta an hmuh chhuaha zirin enkawlna pawh ṭan nghal a ni ang.
·    Chest XRay, ECG, Thisen leh thil dang test ṭûl apiang  an test ang a, Stroke awmtîrtu nia rinhlelh hmuhchhuah a nih chuan chu chu enkawlna pêk nghal a ni bawk ang.

Engtinnge ni zêl ang le? Stroke hi natna namai lo tak a ni a, zaa 40 vêl chauhvin ngai an awh leh ṭhin.  Ṭhat chhuah leh hun chhûng hi a inang lo va, thla emaw kum emaw hial a duh ṭhin. Za zêla 25 chu Stroke an neih aṭanga kum 2 chhûngin an thi niin an chhût a, stroke nei tawh nei nawn leh hi engemaw zat an awm bawk.
In lama inenkawl:  Mahnia che thei lo enkawl hi a enkawltu tân dawhtheih leh zaidam a ṭûl khawp mai. Zun leh êk inthiar thei lote phei chu enkawl ngun an ṭul leh zual a, an zun siaksak hial ngai an nih chuan an zun siakna catheter kha a khât tâwkin (kar khatah vawi khat tal) thlâk ni se.  Mahnia inlet thei loten mawng/ngûm pân (Pressure sores) an neih loh nan darkar 2 emaw 3 emaw danah an mut dân sawn sak fo tûr a ni. A ṭûl angin doctor râwn fo hreh loh a ṭha.  A tîr aṭangin exercise /physiotherapy tih ṭan nghal a ṭha bawk.
Depression a nei em?  Tun hmaa mi  dangte ṭanpuitu ni ṭhin kha tûnah mahni pawh  inenkawl thei lo leh che hlei thei lova a awm hi  hrehawm a ti êm êm ang tih hriatpui tûr a ni a, Stroke ṭhenkhat ṭawng thei lote pawh hi rilru buaina nei miah lo leh kan thu sawi zawng zawng  hre thei vek an ni fo tih hriain an bula kan ṭawngkamte hi fimkhur tûr a ni. Midangte tana phurrit mai thlentu nia an inhriat chuan thih mai an duh zawk fo ṭhin. Chu chuan an natna aṭanga ṭhatchhuah lehna kawng nasa takin a dâl thei a ni.  Chuvangin, rilru zângkhai leh beiseina nei tûr zâwnga kan enkawl pawh a ṭûl  tih hriat tel a ṭha.
                                                  ……………….
References:



18 comments:

  1. A va tha tehreng em. Thisen sang ka nei ve deuh va, chutichung chuan a thalo ani tih hre reng chungin 'chi' ei hi ka insum thei thlawt lo.

    He blog i lo siam kher kher hi chu a va'n vanneihthlak tak em.

    ReplyDelete
    Replies
    1. Click theih tura i dah hi hmet zeuh ila, i revenue ah a lut ang em? A luh dawn chuan ka hmet zeuh zeuh dawn a nia....

      Delete
  2. @caribou, i ti lawmawm ṭhin mang e. I BP sâng chu lo control ngei la a ṭha ang. Chi hi ṭhenkhat chuan chuti lutuka insûm a ṭul lem lo ti an awm tho. Nghei tawp chu a ṭul lem loin ka hria. Amaherawhchu, ei tam loh theih chu a ṭha ang.

    Thli click keuh keuh tur ho hi i duh chuan lo hmet zeuh zeuh rawh. Miin an click mai ni lovin an product an lei chauhin revenue kan nei ve. Tih loh aiah kan han ti ve mai mai a nih hi.

    ReplyDelete
  3. A bengvarthlak hle mai. A hming hi ka hre bel em em ringawt a, i rawn post-a a lawmawm takzet a ni.

    ReplyDelete
    Replies
    1. TS, i ti lawmawm e. Stroke te hi chu a hming chauh hi hria ila a tâwk khawp mai. Tumah hian nei lo se a ṭha ngawt ang

      Delete
  4. ka fing leh ta sawt mai. I ti tha thlawt mai..

    ReplyDelete
  5. This comment has been removed by the author.

    ReplyDelete
  6. Bengvar thlak e. Ka hlauh zawng tak mai a ni.

    ReplyDelete
    Replies
    1. Stroke hi chu a hlauhawm khawp mai. Vawilehkhatah a ti thut duh lehnghal a. BP sang lo tura inenkawl hi a pawimawh berin a lang.

      Delete
  7. Ka hriat loh hriat ngei a tan a tul tak mai i rawn chhawp chhuak a, ka lawm e.

    tren tren.

    ReplyDelete
    Replies
    1. @Chhuaklinga, kan thu ziak te i lo chhiar a, kei pawh ka lawm e. Topic dang pawh a khat tawka rawn tih chhuah zel tum a ni e.

      Delete
  8. Thuziak rawn tlak a nih hi. Mamawh hun a la awm leh anga chutah chuan chiang deuh zawkin ka la chhiar ang.

    Diktak chuan i identityah hian ka buai...:) Dr Ramdinthara Sailo i nih ka ring ngawt. Ka ring sual che a nih chuan min hrethiam dawn nia.

    I comment hi a Pathian thu thin khawp mai. Ka lo en ziah thin.

    ReplyDelete
    Replies
    1. Krista, lo chhiar ziah rawh khai! Ka identity pawh i ring dik e. Nang pawh i comment chhiar a nuam thin khawp mai. I ti lawmawm e.

      Delete
  9. For newest news you have to go to see internet and on world-wide-web I
    found this web page as a best website for hottest updates.


    Here is my webpage; genetics

    ReplyDelete
  10. A beng var thlak hle mai. Stroke tih hming hi chu ka hre fo a, tunah chuan i zarah ka hre chiang leh zual a, ka lawm khawp mai. Tin, thisen sang nei ka ni a, in enkawl that a pawimawh zia ka hriat belh a, ka lawm e.

    ReplyDelete
  11. Stroke natna hi tunge/ khawi damdawiin nge kan pan ang

    ReplyDelete