Post 2: Hlauhawm Tak Leh Mak Taka Siam

“I hnenah lawm thu ka hrilh ang che; hlauhawm tak leh mak taka siam ka ni si a”. (Sam 139:14)

Mihring  taksa  Pathianin a siam dan  hi a mak  em em a, “khawl” (machine) ang pawhin ngaihtuah ila khawl ropui ber a tling hial awm e.  Taksa bung hrang  hrang leh a hnathawh dante hi hetia han sawi sen mai chi pawh a ni lo va, taksa chhunga ‘khawl’ hrang hrangte thu khat vuaa inlungrual taka an thawh ho dan te hi chhui chian poh leh a mak tawlh tawlh a ni ber mai.

Hriatna tizau atan kan taksa bung thenkhat makzia hi lo thlir thuak thuak teh  ang:  

Ruh:

·         Kan pian hlim hian ruh 350 vel neiin kan lo piang a, kan than len laiin  ruh thenkhatte an inzawm a, kan han puitlin meuh chuan ruh 206 chauh kan nei ta a ni.

·         Ruh hi granite tlukin a chak a,  nawhalh bawk tia lek hian Ton 9 a rit  a dawl zo.

Tihrawl:

·         Tihrawl 600 chuang  i nei.

·         I nuih hian tihrawl 17 i hmang a, i thinur i nur hian tihrawl 47 lai i hmang thung!

Digestive System:

·         Ni tin chil litre 1.7 vel kan tichhuak a, dam chhungin gallon 10,000 vel kan tichhuak hman.

·         Mi pangngai hian kum khatah chaw kg 500 vel a ei thin.

·         Pumpui chhung lam tuamtu ‘cells’ te hi pumpui thurin a tihchhiat  hmain ni 3 vel dan zelah a tharin an inthlak vek thin.

Respiratory System:

·         Mihring pangngai hi ni tin vawi 22,000 vel  kan thaw a,  boruak litre 11,500  vel kan thaw lutin kan thawchhuak hman. Minit khatah Oxygen  250ml thaw lutin Carbon Dioxide 200ml kan thaw chhuak thung.

·         Chuap chhunga thisen zamte hi zawm khawm ta ila kilometer 1,600 vela sei a ni ang.

·         Chuap chhung pindan te tete hi kaipharh ta vek ila Tennis Court khuh thei khawpa hlai an ni ang.

Heart & Circulatory System:

·         Lung hi minit khatah vawi 72 vel phuin, ni tin vawi 100,000 chuang a phu a, kum khatah  40,000,000 vel a phu hman

·         Lung hian ni tin thisen gallon 2,000 vel a pam (pump) chhuak a, dam chhungin gallon maktaduai khat leh a chanve vel a pump a, chu chu oil tanker 200 vel phur tawk a ni!

·         Thisen zam zawng zawng hi zawm khawm tai la mel 60,000 vela sei a ni ang!

Central Nervous System:

·         Mihring pakhat thluak hian khawvela telephone zawng  zawng  thu thawn zat aia tam ni khatah a thawn chhuak thei!

·         Thluak atanga taksa peng danga thuthawn kal chak zawng chu darkar khatah  mel 248 vel ang a ni.

Heng bak pawh mihring taksa ropuizia sawi tur tam tak a la awm a, sawi  sen  a ni lo. Amaherawhchu, heng kan sawi baka thil chiang em em mai chu hei hi a ni:

Pathian hian mihring taksa hi HRISEL tur leh natna laka mahni inveng thei turin a siam! He mi tichiangtu thil thenkhat chauh lo tarlang leh ila:

·         Taksa pianphung:  Kan taksa peng derdep leh venhim ngai apiang (entir nan thluak, lung, adt) te hi fel takin ruh khauh tak chhungah a thun thlap a!  A ruah tui dawng lo zawnga kan hnar kua a han dah te hi a va finthlak em!  Kan vun te hi ‘water proof’ ngatin a siam a, chu mai ni lovin vuna thlan leh thil dang awmte hian natna hrik engpawh an tihlum zung zung thei zu nia!

·         Mahni in ‘repair’ thei tur siam:  Taksaah hliam emaw pem emaw lo awm se engmah  ti lo mah ila taksa kha amah leh amah in ‘repair’ turin hma a la nghal hmiah hmiah zel.  Doctor ten mi an zai pawhin damlo taksaa an zaina hmuamhma tidama tiphuitu chu taksaa thil awmsate kha an ni.  Thisen lo chhuak ta se la, chu pawh chu a tiphui turin hma a la nghal a, tuisik ang maia a luan reng loh nan thisen chu a lo khang nghal a, chu chuan thisen chhuak chu a titawp thin a ni.

·         Taksaa tuiril: Thisen, mittui, chil leh hnap te thleng hian  natna hril tihhlum theihna an nei vek!

·         Ral do khawl (Immune System):  Immune system ropuizia hi chu sawi fiah thiam harsa khawp a ni!  Natna hrik taksaa  lo lutte an lo tihlum chauh ni lovin,  dam chhungin chung natna hrik laka taksa lo inveng thei tura buatsaihtu a ni!  Natna hrik lo lut apiang an lo tihhlum bakah an lo chhinchhiah thlap thlap a, an theihnghilh leh ngai tawh lo! Ni dangah khang natna hrik ang kha lo lut leh ta se an lo hre nghal chat chat thei zel a, a tihhlum dan bik an thiam sa kha an lo hmang nghal chat zel zu nia!

Heng zawng zawng tlangkawmna chu hei hi a ni:   Hriselna hi i chanvo a ni a, chu chu Pathianin a siam dan che leh a duh dan a ni bawk.  Chuvangin, i taksa vawng hrisel tura mawhphurhna chu i chungah a tla nghal a, i hriselna tichhe thei thil zawng zawng lakah inveng fimkhur ang che.