Thuhma: Mizote zingah Septcaemia vanga thi kan awm leh zauh thin a, a pawi hle mai. He natna chungchang hi tawi kim deuhin i lo sawi dawn teh ang.
Septicaemia chu engngeni? Kan thisenah natna hrik tam tak lo lutin an inthlah pung hluai a, chu chuan taksa nasa taka khawihin, khawsik, BP hniam leh thil dangtea lo lang chhuak hi Septicaemia chu a ni. Septicaemia hi awlsam tea thihpui theih a nih avangin a rang thei ang bera enkawl nghal an mamawh thin.
Septicaemia chu engtia lo awm nge? Kan taksa peng khawi laiah emaw natna hrikin bu a lo khuar a (infection), chu mi atang chuan natna hrikte chu thisen zamah an lo lut ta thin a ni. Septicaemia hi chi hnih ang deuhin a then theih: (i) Primary Septicaemia –natna hrik bu khuarna (infection) lai tak hriat theih mai loh hi. A tlangpui thuin hetianga dam lote hi tar chak lo te, zu ngawl vei te, zun thlum leh natna benvawn dang engemaw neite zingah an tam bik. (ii) Secondary Septicaemia-natna hrik bu khuarna hmun awm hriat theihte: Chung natna hrik bu khuarna hmun lar zualte chu: vun (pem leh pan hnai la te), zun kawng, chuap leh thawkna dawt, mitbawm (gallbladder), ril leh kumkuruh chhung, etc. Damlo, damdawi ina awm sa zingah chuan zun siakna catheter atang te, IV pekna canula atang te, zaina (surgery) hmuamhma ‘septic’ atang te, kang (burns) leh adt. atangin septicaemia hi a thleng thei bawk a, rei tak natna tuara taksa chak tawh lote leh natna benvawn neiten an vei awl bik bawk.
Taksaa a lan chhuah dan: Khawsik, tlun, BP hniam, lu leh tihrawl na te hi Septicaemia hian a keng tel tlangpui thin. A tir lamah erawh chuan taksaa lang chhuak mang lovin hun engemaw chen a awm thei bawk. Septicaemia hian taksa hmun dang dangah ‘septic’ bu khuar(foci) a siam thei a, a chang phei chuan natna hlauhawm tak ‘septic shock’ hial a siam thei bawk.
A enkawl dan: Septicaemia nia rinhlelh chu a awmtirtu natna hrik hriat theihna turin thisen, zun,khak, ek, pan hnai, adt. ‘culture’ hmanga endik nghal tur a ni a, a result a chhuah hma pawhin a ngeih ber tur nia rin damdawi pek nghal vat tur a ni bawk. Eng damdawi nge tha ber ang tih chu a enkawltu doctor-in Septicaemia awmtirtu nia a rin atangin thutlukna a siam ang a, damdawi 2 /3 lai pawh pek ho a tul fo thin. Test result a chhuah hma chuan ni tin damlo awm dan chu enthlithlai reng chungin a tul dan ang zela damdawi pawh tihdanglam theih a ni ang a, Test result a chhuah ve leh a ngeih bik tur damdawi kha pek zui tawh mai tur a ni.
Hriatreng tur: Septicaemia hi thih pui hlauhawm tak a nih avangin a rang thei ang bera inenkawl tur a ni. Heng a hnuaia mi ang hian mi a dam loh chuan damdawi in/doctor pan nghal thuai a tha.
· Damlo na taka khawsik leh tlun
· Engemaw chen dam lo tawh a rilru a lo buai tan deuh chuan
· Damlo chu a vunah duk thliah thliah te a lo awmin emaw, a ha hni leh hnar thi emaw a neih chuan.
